Inaprobahan na ngayon ng Pangulong Gloria Arroyo ang naging rekomendasyon ng National Disaster Coordinating Council (NDCC) na magdeklara ng state of calamity sa buong Mindanao, dulot ng nararanasang power crisis. Inihayag ni Mindanao Development Authority chairman Jesus Dureza na nilagdaan na ng Pangulo ang rekomendasyon ni NDCC chairman at Defense Sec. Norberto Gonzales hinggil sa naturang deklarasyon. Sa ilalim ng deklarasyon, pwede ng gamitin ng national at mga local government units ang mga nakalaang calamity fund sa paggawa ng mga short-term solutions sa problema sa power supply.

BACOLOD CITY - Matapos ang limang araw na pananatili sa kamay ng mga abductors, nakalaya na rin ang negosyanteng si Jordan Chua na dinukot noong Marso 5, 2010 sa Brgy. Dulao, Bago City, Negros Occidental.  Ayon sa source ng Bombo Radyo Bacolod, si Chua ay na-release alas 10:00 kahapon ng umaga sa Cebu.  Sinasabing nakatakas mula sa mga kidnappers ang biktima at na-rescue ng hindi pa natukoy na unit o grupo.  Sa ngayon si Chua ay nasa tanggapan na umano ng PNP headquarters sa Camp Crame, Quezon City.

Naungusan ngayon ng telecom tycoon sa Mexico na si Carlos Slim Helu ang Microsoft founder na si Bill Gates bilang pinakamayamang tao sa mundo. Sa inilabas na ranking ng Forbes magazine, nangunguna na ngayon si Helu na ang kabuuang yaman ay nasa $53.5 billion, tumaas ng $18.5 billion sa loob lamang ng isang taon. Napag-alaman na noong 2009, pangatlo lamang si Helu sa pinakamayamang tao sa mundo ayon pa rin sa Forbes. Ang dati ay nangungunang si William "Bill" Gates III, ngayon ay pangalawa na lamang na may $53 billion assets.   

DALLAS, Texas - Sa unang pagkakataon ay binuksan na sa publiko ang Dallas Cowboys Stadium kung saan gagawin ang Manny Pacquiao-Joshua Clottey fight. Bandang ala 1:30 ng hapon oras sa Texas, isinagawa ang final press conference kung saan ito rin ang unang pagkakataong nagharap ang dalawang boksingero simula noong isinagawa nila ang kanilang promotional tour. Naging maganda naman ang takbo ng press conference ng Pacman-Clottey fight habang pinalilibutan sila ng Dallas Cowboys cheerleaders. 

Dahil sa pangambang baka hindi makahabol sa itinakdang deadline para makompleto ang mahigit 50 million ballots na gagamitin ngayong May 10 presidential elections, may alternatibong naisip ang Commission on Elections (Comelec).  Ayon kay Comelec Commissioner Gregorio Larrazabal, kukuha sila ng karagdagang mga printers sa Pampanga na siyang mag-iimprenta sa kakailanganing mga balota.

NEW YORK - Iniutos ngayon ni UN Secretary-General Ban Ki-moon sa mga eksperto na i-review ang inilabas na report ng Intergovernmental Panel on Climate Change (IPCC) ng ahensya. Ito'y kasunod ng pressure na nakaatang ngayon sa IPCC dahil umano sa ilang mali sa major assessment ukol sa climate science noong 2007.