DAGUPAN CITY - Patay ang 28-anyos na miyembro ng Philippine Coast Guard (PCG) matapos mahagip ng bus na kanya mismong sinakyan sa bayan ng Sison, lalawigan ng Pangasinan.

Nakilala ang biktimang si Richard Padua, residente ng Bicutan Pasig.

Sa imbestigasyon ng pulisya, bumaba ang biktima sa Brgy. Paldit sa nasabing bayan mula sa sinakyan nitong Victory Bus Liner na may plate number CPD-2444.

Kasunod nito, bigla na lamang umanong may narinig na kalabog ang mga sakay ng naturang bus at tumambad sa mga ito si Padua na naipit sa gulong at pinaniniwalaang nakaladkad.

Isang Danny Palamares, 44-anyos at residente sa San Antonio Zambales, ang nagmamaneho ng bus.

Bagama't naisugod sa pagamutan ang biktima, ideneklara na itong dead on arrival ng mga doktor.

Samantala, nakipag-ugnayan na ang kompanya ng bus sa pamilya ng biktima at ipinangakong sasagutin ang burol at libing nito.