Bagama't kinilala ang ginagawang pagsisikap ng pamahalaan ng Pilipinas na maging matiwasay at malinis ang halalan sa darating na Mayo, hindi pa rin ito nakaligtas sa mapanuring mata ng mga international observers. Matapos ang isang linggong pag-obserba sa ginagawang paghahanda para sa unang automated election sa bansa, inihayag ng National Democratic Institute na nakabase sa US, na dapat pang tiyakin ng Commission on Elections na hindi kayang dayain ang mga makinang gagamitin sa pag-transmit ng resulta ng halalan.