BAGUIO CITY – Kinumpirma ni Police Colonel Clarence Casillio, Provincial Director ng Mountain Province Police Provincial Office na nasawi ang isang lalaki habang sugatan naman ang kasama nito matapos madaganan ang sinakyan nilang motorsiklo sa Saliok, Natonin, Mountain Province.
Nakilala ang nasawi na si Jernel Umbalin, 27-anyos habang sugatan si Jeofrey Abuan, 29-anyos na kapwa residente ng Cagayan.
Batay sa report, sakay ng motorsiklo sina Umbalin at Abuan nang nakita nila ang isang sasakyang na-stranded dahil sa pagguho ng lupa.
Tinulungan ng dalawang biktima ang driver ng stranded na sasakyan ngunit nang bumalik ang mga ito sa kanilang motorskilo ay biglang gumuho ang bahagi ng kalsada na kanilang kinaroroonan.
Naisugod sa Natonin Municipal Health Office ang mga biktima ngunit naideklarang dead on arrival si Umbalin habang nagpapagamot si Abuan.
