CENTRAL MINDANAO – Lumaban ang isang aso hanggang sa huli niyang hininga maipagtanggol lamang ang kanyang amo sa makamandag na ahas sa Kidapawan City.
Ayon kay Jaime Selim isang fastfood manager, pinasok ng makamandag na cobra ang kanyang tahanan sa Brgy Lanao, Kidapawan City.
Ngunit nang makita ito ng dalawang asong dachshund ay inatake nila ang ahas.
Kuhang-kuha sa CCTV sa bahay ni Selim kung paano nakipagbuno ang dalawang aso sa ahas.
Patay ang kulay itim na aso ng makagat ng cobra habang posibleng mabulag ang kulay puting dachshund na tinamaan ng lason (venom) na binuga ng ahas.
Patay rin ang ahas sa natamo nitong maraming sugat sa kagat ng dalawang aso.
Nagpasalamat naman si Selim sa ginawa ng kanyang aso dahil nasa loob mismo ng kanyang tahanan ang isang taong gulang nyang anak nang mangyari ang pagpasok ng cobra.
Planong parangalan ngayon ng mga dog owners/lovers organization sa Kidapawan City ang ginawang pagtatanggol ng dalawang aso sa kanilang amo.
