BUTUAN CITY – Kinasuhan na ng double murder matapos sumuko ang isa sa dalawang umano’y gunmen na bumaril-patay sa dalawang mga escorts ng mayor sa bayan ng San Benito, Surigao del Norte nitong nakalipas na alas-10:30 ng gabi.
Ang nasabing insidente na nangyari sa Brgy. Bongdo ay kumitil sa buhay ni Nicomides Rivas at sa angkas nito habang naka-convoy sa sasakyan ni Mayor Rushford Dedumo.
Nakilala ang sumukong suspek na si S/Sgt. Dan Dumanjog, police escort umano ng kandidato sa pagkakonsehal na si William Pulican kung saan isinuko rin ang kanyang 9mm na issued firearm.
Una nang inihayag ni San Benito police chief Lt. Vicente Serrano na narekober sa crime scene ang isang kalibre .38 na revolver at 14 na mga basyo ng 9mm pistol at kalibre .45 na pistola.
Una nang inihayag ng mga supporters ni mayoral candidate Gina Menil na ang mga namatay ay mga goons umano ni Mayor Dedumo ngunit ayon sa alkalde, ang biktimang si Rivas ay supporter ng kanyang kalaban at ngayo’y lider na ng kanilang partido kung saan ang kanyang asawang si Ruth Estoque ang kakandidato pagka-mayor.
