LEGAZPI CITY – Nananatili ngayon sa ospital ang isang bata matapos araruhin ng dump truck ang kanilang bakuran habang hindi na nailigtas pa ang buhay ng dalawa katao na kasama nito sa bahay sa Brgy. Rizal, Gubat, Sorsogon.
Nabatid na pag-aari ng lokal na pamahalaan ng Barcelona ang naturang truck ng basura subalit nagtungo sa lugar ang driver upang sunduin ang asawa.
Sa panayam ng Bombo Radyo Legazpi kay Gubat Municipal Disaster Risk Reduction and Management Office Rhalen Endeno, binabagtas ng truck ang pakurbang bahagi ng daan habang mabilis ang pagpapatakbo nito.
Subalit pagdating sa lugar, nakasalubong nito ang isang motorsiklo at dahil sa pagkabigla, kinabig patungo sa isang bahay kung saan naglalaro ang mga bata.
Sa kasalukuyan ay hindi pa pinapangalanan ng opisyal ang naturang mga biktima gayundin ang driver na nasa kustodiya na ng pulisya.
Nagpaalala naman ang opisyal na huwag magmaneho kung nasa ilalim ng impluwensya ng alak at iwasan ang pagdadala ng mga government vehicle sa personal na lakad.
