CENTRAL MINDANAO – Patay ang dalawa katao at isa ang sugatan sa pamamaril dakong alas-7:45 nitong Martes ng gabi sa Cotabato City.
Nakilala ang mga nasawi na sina Anwar Sabang, 35, at isang alyas Thoe kapwa mga residente ng Sultan Kudarat Maguindanao.
Sugatan naman si Monies Guintawan, 45, may asawa at residente ng Bubong road, Cotabato City.
Ayon sa ulat ng Cotabato City Police Office na nag-iinuman ang mga biktima sa loob ng Gastric Place sa bahagi ng Notre Dame Avenue at kanto ng Tamse Road, Brgy Poblacion 3 ng lungsod nang sila ay pagbabarilin ng mga hindi kilalang suspek gamit ang kalibre .45 na pistola.
Mabilis namang tumakas ang mga suspek sakay ng motorsiklo habang naisugod kaagad sa pagamutan ang mga biktima ngunit dalawa sa kanila ang dead on arrival.
Sa ngayon ay nagpapatuloy ang imbestigasyon ng mga otoridad sa Cotabato City sa naturang pamamaril sa mga biktima.
