Patay ang isang pitong taong gulang na batang babae matapos na ito ay nadaganan ng bumagsak na pader sa kasagsagan ng lindol sa Tulunan, North Cotabato.
Sinabi ni Tulunan Mayor Reuel Limbungan, na mula sa Datu Paglas sa Maguindanao ang biktima kung saan itinakbo ito sa pagamutan sa Tulunan subalit idineklara ng mga doctor na ito ay patay na at isa rin ang patay sa Davao del Sur.
Kinansela na rin ni Limbugan ang pasok sa eskuwela sa lahat ng antas sa Tulunan.
Nagpasya rin si Davao City Mayor Sara Duterte na kanselahin klase sa lahat ng antas bukas subalit nilinaw nito na may pasok ang mga kawani ng gobyerno.
Umabot naman sa 20 katao ang sugatan dahil sa lindol sa Magsaysay, Davao Del Sur.
Sinabi ni Anthony Allada, information officer ng Magsaysay na dinala na agad sa pagamutan ang mga nasugatang biktima at maraming bahay din ang nasira sa nasabing lindol.
Nasunog naman ang Gaisano mall sa GenSan matapos ang pagtama ng lindol.
Itinaas na ng Bureau of Fire Protection sa alert level four ang nasabing sunog at inaalam pa ng mga otoridad kung may naiwang tao sa loob ng gusali.
