BACOLOD CITY – Ginagamot pa sa ospital ang dalawang pulis sa lungsod ng Bacolod na nasugatan makaraang manlaban ang subject ng warrant of arrest na kanilang inihain sa Barangay Singcang Airport.
Sa panayam ng Bombo Radyo kay Bacolod City Police Office (BCPO) Spokesperson Police Lt. Liberty Indiape, magsisilbi sana ang mga kasapi ng Bacolod City Mobile Force Company ng warrant of arrest sa kasong murder laban kay Limuel Talaman, 34-anyos at residente ng Purok Neptune, Barangay Singcang.
Habang binabasa kay Talaman ang kanyang constitutional rights, bigla itong bumunot ng baril.
Sinikap ng mga pulis na ito ay dis-armahan ngunit nagawa pa rin nitong magpaputok.
Tinamaan sa kaliwang kamay si Patrolman John Ray Ortega samantalang nasugatan naman sa paa ang team leader na si Police Lt. Roque Gimeno III habang pina-pacify ang suspek.
Sa kabila nito, nadis-armahan pa rin si Talaman at naaresto ng mga pulis.
Sa ngayon, nakakulong ito sa Bacolod City Police Station 8.
Tiniyak naman ng BCPO na mabibigyan ng tulong pinansyal ang dalawang pulis na nasugatan in the line of duty.
