Dalawang senior high school student, patay sa banggaan ng motorsiklo at truck sa Iloilo
ILOILO CITY -Patay ang dalawang senior high school student matapos sumalpok ang motorsiklo sa isang truck sa Sitio Kalawidan Brgy. Igcocolo, Guimbal Iloilo.
Ang mga biktima ay sina Joseph Anthony Alexander, 18, Nahapay, Guimbal, Iloilo, driver ng motorsiklo at backrider nito na si Kyle Dela Piedra, 18, ng Tagpu-an, Tubungan Iloilo.
Sa eksklusibong panayam ng Bombo Radyo Iloilo kay Police Lt. Nelson Caro, hepe ng Guimbal Municipal Police Station, sinabi nito na papunta sa bayan ng Guimbal, Iloilo ng mga biktima sakay ng motorsiklo ng nakasalubong ang truck na minamaneho ni Rogelio Garganza, 51 ng Sitio Kalawidan Brgy. Igcocolo, Guimbal Iloilo.
Ayon sa hepe, biglang lumiko ang truck at bumangga dito ang motorsiklo.
Dahil sa malakas na impact, tumilapon ang mga biktima na hindi nakasuot ng helmet dahilan upang magtamo ang mga ito ng sugat sa ulo na siyang dahilan ng kanilang pagkamatay.
