2 sugatan sa pananaksak sa Quezon province

NAGA CITY – Sugatan ang dalawa katao sa pananaksak sa Barangay Ilayang Samil, Lucban, Quezon.

Kinilala ang mga biktima na sina Richard De Roxas Monge at Mark Jay Bondad Miel.

Sa nakalap na impormasyon ng Bombo Radyo Naga mula sa Quezon Police Provincial Office (QPPO), nabatid na habang nag-iinuman ang dalawa nang biglang dumating ang suspek na si Ricky Borlado Marantal na lango sa alak.

Nagkaroon umano ng mainitang pagtatalo sa pagitan ng mga biktima at ng suspek na nauwi sa pananaksak.

Nagtamo ng sugat sa iba’t ibang bahagi ng katawan ang mga biktima na agad naman isinugod sa ospital habang agad ding naaresto ang suspek at ngayon ay nakakulong na.