NAGA CITY-Timbog ang dalawang suspetsadong drug dealer sa buy-bust na isinagawa sa Candelaria, Quezon.
Kinilala ang mga suspek na sina alyas Rustie, 24 anyos, residente ng Purok 4, Malabanban Sur, Candelaria, Quezon, at si alyas Leonida, 43 anyos, residente ng Purok 4, Brgy. Malabanban Sur, Candelaria, ng kaparehong probinsya.
Sa nakuhang impormasyon ng Bombo Radyo Naga sa Quezon Police Provincial Office, napag-alaman na inaresto ang mga suspek pagkatapos na makabili sa kanila ang poseur-buyer ng mga awtoridad ng isang pirasong heat-sealed transparent plastic sachet ng pinaniniwalaang shabu.
Nang kinapkapan ang mga suspek, nakuha dito ang buy-bust money at tatlo pang heat-sealed transparent plastic sachet ng pinaniniwalaang ilegal na droga.
May bigat aniya ang nakumpiskang pinaniniwalaang ilegal na droga na 16 grams at nagkakahalaga ng ₱108,800.
Sa ngayon, dinala na ang mga suspek sa Candelaria Municipal Police Station para sa karampatang disposisyon.
