BAGUIO CITY – Nasa kustodiya na ng pulisya ang suspek sa kidnapping sa tatlong mga bata sa Itogon, Benguet.
Matagumpay na natagpuan ng mga otoridad nitong nakalipas na Martes ng umaga ang tatlong batang magkakamag-anak sa Minac, Tuding, Itogon, Benguet na naibalitang nawawala mula pa noong Lunes.
Dalawa sa biktima ay babaeng may edad na pito at walo at isang lalaki na may edad na pito.
Ayon kay Maj. Rommel Sawatang, hepe ng Itogon Municipal Police Station, sa isinagawang manhunt operation ay natagpuan ang mga bata sa bulubunduking bahagi ng Sitio Tuwap, Gumatdang, Itogon kaninang alas-11:45 ng umaga.
Nagresulta rin ito sa pagkakaaresto sa suspek na si Rogel Fernandez, 50, na isang construction worker.
Nagpapatuloy pa ang imbestigasyon para matukoy ang motibo ng suspek habang sumasailalim na sa interventions ang mga biktimang menor de edad.
