KORONADAL CITY – Nahuli ang tatlong traysikel driver sa lungsod ng Koronadal, South Cotabato sa isinagawang mahigpit na operasyon ng mga kasapi ng Koronadal City Traffic Section laban sa mga colorum vehicles at mga pasaway na driver sa siyudad.
Sa eksklusibong panayam ng Bombo Radyo Koronadal kay Koronadal City Traffic Chief Ruel Bagunoc, ang tatlong traysikel driver ay nahuling naglalagay ng salamin sa harap at ibabang bahagi ng inuupuan ng mga pasahero kung saan target umano nito ay ang mamboso sa mga nakapaldang babae at mga nagsusuot ng damit na labas ang cleavage.
Agad namang pinangaralan ang mga nahuling driver at binigyan din ng sanction at pinatanggal ang mga nakalagay na salamin upang di magamit sa pamboboso o pambabastos ng mga babaeng pasahero.
Napag-alaman na posibleng magdulot din umano ito ng disgrasya lalo na at nakatuon ang atensyon ng driver sa salamin at hindi sa daan.
Itinanggi naman ng tatlong nahuli ang paratang laban sa kanila.
