CENTRAL MINDANAO-Tatlo ang nasawi,dalawa ang nakatakas at isang pulis ang sugatan sa search warrant operation sa probinsya ng Cotabato.
Nakilala ang mga binawian ng buhay na sina Maano Sanday, Norman Samsudin at Baganian Baguinda Alimao, 65 anyos.
Nakatakas naman sina Abdullah Kurdotoy at Jonathan Kadalem,mga residente ng Barangay Macabual Pikit Cotabato.
Sugatan naman si Corporal Eric Saltin Buslayan ng 45th Special Action Company (SAC) ng PNP Special Action Force (SAF).
Ayon sa ulat ng Cotabato PNP na nagsagawa ng Search Warrant Operation ang mga tauhan ng PNP-SAF at Pikit MPS katuwang ang militar laban sa mga suspek sa Barangay Macabual Pikit Cotabato.
Papasok palang mga pulis sa kanilang target ay pinaputukan na ito ng mga suspek na humantong sa palitan ng putok sa magkabilang panig.
Patay ang tatlo sa mga suspek at dalawa ang nakatakas habang isang pulis ang nasugatan.
Narekober mula sa mga suspek ang ang dalawang M16 Rifles, dalawang bandoliers, isang home made shotgun, dalawang short steel M16 magazine, 48 live ammunition at iba pa.
Naisugod pa sa ospital ang tatlong suspek ngunit dineklarang dead on arrival ng mga doktor matapos magtamo ng maraming tama ng bala sa ibat-ibang parte ng kanilang katawan.
Ang mga nasawi at nakatakas ay may mga standing warrant of arrest sa kasong murder at multiple frustrated murder.
Sa ngayon ay patuloy na tinutugis ng mga pulis ang dalawa sa mga suspek na nakatakas.
