CEBU – Higit sa limang kilo ng hinihinalang shabu na nagkakahalaga ng halos P35 milyon ang nasabat ng mga operatiba ng City Drug Enforcement Unit ng Cebu City Police Office (CCPO) Sabado ng madaling araw, sa Barangay Pahina Central.
Dalawang indibidwal din ang inaresto ng pulisya sa nasabing operasyon na diumanoy magpinsan.
Kinilala ang mga suspek na silang Shelljay Cintino Cuyno alyas Tolljay, 24 taong gulang, walang trabaho, residente ng Calderon St. Brgy. Ermita at pinsan nitong si Dennis Cintino alyas Dennis,27 taong gulang na residente ng Pig Vendor Brgy, Ermita, Cebu City.
Naaresto ang dalawa sa isinagawang buybust operation sa Panganiban Balagtas St. Brgy. Pahina Central, Cebu City.
Nakuha rin mula sa mga suspek ang P50,000 na buybust money.
Aabot sa 5 kilo at 125 na gramos ng shabu ang nasabat ng otoridad na aabot sa halagang P34.8 milyon pesos base na sa street drug price nito.
Mahaharap sa kasong paglabag sa RA 9165 ang dalawang magpinsan na kasalukuyang nakakulong sa Cebu City Police Office.-BJR.
