Ibinunyag ng Department of Information and Communications Technology ang naitala nitong higit-5 milyon cyber attacks sa iba’t ibang mga ahensiya ng gobyerno noong nakaraang taon.
Ito ay kinumpirma mismo ni Undersecretary Jeffrey Ian Dy ng naturang kagawaran at ibinahagi pang 32 government agencies ang pinuntirya ng 5.4 malicious attempts na kanilang nadiskubre.
Ayon sa kanya, nasa 2,500 cases na ang kanilang naproseso kung saan 60 sa mga ito ay natuklasang mga Advanced Persistent Threat Groups (APT) groups na aniya’y malaking banta sa seguridad ng bansa sapagkat ito’y mga state-level types of hacking na.
‘In 2024, the DICT (Department of Information and Communications Technology) automatically deterred approximately 5.4 million malicious attempts against 32 government agencies connected to our national security operating centers,’ ani Undersecretary Jeffrey Ian Dy ng Department of Information and Communications Technology (DICT).
‘We processed 2,500 cases, 60 of them are from Advance Persistent Threat Groups (APTG),’ dagdag pa ni Undersecretary Jeffrey Ian Dy ng DICT.
Ngunit paglilinaw naman niya, wala umanong nakompormisong operasyon o nakuhang data sa mga ahensya ng gobyerno matapos mapaulat ang iba’t ibang insedente ng hacking sa mga ito.
Kaugnay pa rito, dahil sa mga naitatalang malakihang kaso ng hacking, ibinahagi ni Undersecretary Jeffrey Ian Dy na walang ‘unhackable system’ kaya miski ang gagamiting automated election system ay hindi isinasantabi ang posibleng hacking din umano sa halalan.
Gayunpaman, tiniyak naman niya na ang sistemang gagamitin sa magaganap na eleksyon ay mayroong sapat na seguridad at proteksyon kung mayroon mang grupo na sumubok i-hack ang system.
‘What I’m trying to say is, walang unhackable system. But I think the security of the automated election system given the time factor into consideration is enough to mitigate any attempts to attack,’ ani Undersecretary Jeffrey Ian Dy ng Department of Information and Communications Technology.
