ROXAS CITY – Binaril ng hindi pa nakikilalang mga suspek ang isang 54 anyos na lalaki sa Barangay Bolo, Roxas City.
Kinilala ang biktima na si Junifer Borda, retired army at nagtatrabaho bilang isang head security at officer-in-charge sa isang security agency.
Ayon kay Jeron, witness sa naturang insidente, nagulat na lamang daw ito nang makarinig ng halos apat na sunod-sunod na putok ng baril.
Nakita umanong nakasakay sa motorsiklo ang dalawang suspek na lumapit sa biktima at matapos ang pamamaril ay may kinuha pa umano sa bag ni Borda bago tumakas papalayo.
Ayon naman sa misis ng biktima, wala itong ideya kung sino ang posibleng bumaril sa kaniyang mister dahil wala naman umano itong kaaway.
Nabatid na nakatakda sanang magpasweldo ang biktima kung kaya’t may dala itong pera sa kaniyang bag na tinangay ng mga suspek.
