LEGAZPI CITY – Negatibo sa isinagawang pagsusuri ng Research Institute for Tropical Medicine (RITM) ang anim na patients under investigation (PUI) sa Bicol sa banta ng Coronavirus Disease (COVID-19).
Inihayag ni DOH Bicol director Dr. Ernie Vera sa Bombo Radyo Legazpi, apat sa mga ito ang nakalabas na ng ospital habang tinatapos na lamang ng dalawa pa ang 14-day quarantine period.
Ayon kay Vera, mahigpit ding tinututukan ang 12 persons under monitoring (PUM) na may travel history sa mga bansang may kumpirmadong kaso ng COVID-19 subalit hindi naman nakitaan ng “flu-like symptoms.”
Muling ipinaalala ng opisyal ang pagsunod sa protocol sa preventive measures maging sa pagbabahagi ng impormasyon upang hindi makalikha ng alarma sa publiko.
Samantala, ipinagpapasalamat naman ng opisyal na unti-unti nang nakokontrol ang pagkalat ng mga fake news sa rehiyon kaugnay ng COVID-19.
