TUGUEGARAO CITY – Nag-iwan ng dalawang kataong patay, habang 11 ang sugatan matapos na mahulog ang isang dump truck sa bangin sa Paracelis, Mt. Province, kagabi.
Kinilala ni Police Staff Sgt. Glen Edchamag ng Paracelis-Philippine National Police, ang mga namatay na sina Lorea Balkanao, pitong taong gulang, at Lolita Bakilan.
Sinabi ni Edchamag na sa kanilang pagtatanong sa driver ng dump truck, napansin daw niyang may problema sa kanyang sasakyan subalit itinuloy pa rin ang pagmaneho hanggang sa hindi na niya nakontrol ang manibela.
Kasunod nito ang pag-atras ng sasakyan hanggang sa mahulog sa bangin na may lalim na 30 meters.
Nabatid na mula sa Tabuk City, Kalinga, ang truck na kumuha ng mga semento at buhangin at nakisakay lamang ang mga pasahero nito at papunta sana sa Barangay Bunot, Paracelis.
