900K Pinoy, nakaahon mula sa kahirapan – PSA

Nasa tinatayang 900,000 Pilipino ang nakaahon mula sa kahirapan base sa pinakabagong report mula sa Philippine Statistics Authority (PSA).

Kung saan lumalabas na ang poverty incidence ay bumaba sa 22.4% sa unang kalahati ng taong 2023 mula sa 23.7% na naitala sa parehong period 2 taon ang nakakalipas.

Ayon sa ahensiya, ang 22.4% ay katumbas ng 25.24 million Pilipino habang ang 1.3 percentage point naman ay nangangahulugan na halos 900,000 Pilipino ang nakaalpas na mula sa kahirapan at nasa middle-class status na.

Una rito, target ng Marcos administration na maibaba pa ang poverty level sa ating bansa mula sa 18% na naitala noong 2019 sa 8% bago matapos ang termino ni PBBM sa 2028.