Kasunod ng deklarasyon ni Pangulong Marcos na palawakin ang internet connectivity sa Pilipinas, nanawagan ang isang advocacy group sa mga property owners na alisin ang mga bayarin na kanilang sinisingil para sa pag-install ng broadband connectivity ng telekomunikasyon.
Sa isang pahayag, sinabi ng tagapagsalita ng Suki Network na si Reginald Vallejos na ang hakbang ay magbibigay sa mas maraming Pilipino ng kinakailangang internet access na inilalarawan niya bilang pangunahing pangangailangan ngayon.
Aniya ito ay pwedeng ikonsidera bilang public service para sa kapakanan ng mga mamamayang Pilipino.
Sa kasalukuyan, mayroong halos 800 mga gusali sa buong Metro Manila na nag-alis ng mga bayarin sa pag-upa para sa koneksyon sa broadband, ang Makati City na may pinakamataas na bilang ng mga gusali na nagpatupad ng lease-free setup para sa digital connectivity, sinundan ng Taguig City na mayroong 91 na gusali at Quezon City na may 57 mga gusali.
Binigyang-diin din ni Vallejos na dapat “makilahok” ang gobyerno sa pagsuspinde ng mga bayarin sa lease para sa broadband connectivity at nagpahayag ng suporta sa pagpapatibay ng batas na tutulong sa mga telcos sa pagbibigay ng sapat na internet connection sa pamamagitan ng pagpapalawak ng saklaw nito.
Dalawang panukalang batas ang inihain sa House of Representatives —House Bill No. 8534 at 900, na may isang layunin—upang magkaloob ng malinaw at tiyak na kahulugan at mga alituntunin para sa mga developer ng ari-arian na maglaan ng kinakailangang espasyo para makapaghatid ng mga pangunahing serbisyo sa telekomunikasyon.
Samantala, binigyang-diin ni Vallejos na ang pagpapalawak ng saklaw ng koneksyon sa internet ay mahalaga dahil ang pagkakaroon ng access dito ay isang karapatang pantao.
