Kinilala ni Speaker Ferdinand Martin Romualdez ang kahalagahan ng ARAL (Academic Recovery and Accessible Learning) law na nilagdaan ni Pangulong Ferdinand Marcos Jr. nitong Biyernes.
Sa ilalim ng ARAL law (Republic Act 12028), sinabi ni Speaker Romualdez na magkakaroon ng libre at epektibong national intervention mechanism para sa mga estudyante na nahihirapang matuto ng mga aralin sa partikular sa reading, mathematics at science upang maabot ang competency na itinakda ng Department of Education (DepEd).
Ang buong titulo ng ARAL law ay “An Act establishing an Academic Recovery and Accessible Learning Program and appropriating funds therefor.”
Ang programa ng bagong batas ay tutulong din sa mga nais na bumalik sa pag-aaral at sa mga mag-aaral na mahina na reading, mathematics at science, at sa mga estudyante na bumagsak sa pagsusulit.
Ang ARAL program ay isasagawa tuwing summer break.
Ang mga estudyante sa pribadong paaralan na nangangailangan ng tulong sa pag-aaral ay maaari ring sumali sa ARAL program. Ang DepEd ang tutukoy sa mga eskuwelahan na maaaring makilahok sa intervention program.
Ang mga guro, para-teacher, at pre-service teacher ay maaaring pumasok sa ARAL program bilang mga tutor. Sila ay makatatanggap ng bayad alinsunod sa pamantayan ng DepEd at Department of Budget and Management (DBM).
Ang mga para-teacher ay susuweldo gamit ang badyet ng DepEd o special education fund ng lokal na pamahalaan kung saan naroon ang mga tuturuang estudyante.
Ang tutoring service ng pre-service teacher ay ituturing na relevant teaching experience na kanyang magagamit kapag nag-apply ng plantilla position sa DepEd.
Ang tutorial sa ilalim ng ARAL program ay maaaring gawin ng face-to-face o online o kumbinasyon ng dalawa.
Ang DepEd ay inatasan na makipag-ugnayan sa Commission on Higher Education (CHED), Department of Information and Communications Technology (DICT), Department of Interior and Local Government (DILG), at iba pang stakeholder para sa epektibong implementasyon ng ARAL program.
Ang anumang kontribusyon, donasyon, o grant pera man o in kind ay bibigyan ng exemption sa pagbabayad ng donor’s tax at magagamit na allowable tax deduction.
Ang gastos sa implementasyon ng programa ay isasama sa taunang pondo ng DepEd.
Ang mga lokal na pamahalaan ay pinapayagan na gamitin ang kanilang special education fund para sa pagpapatupad ng programa.
Ang DepEd, katuwang ang iba pang ahensya ang gagawa ng implementing rules and regulations ng bagong batas.
