BUTUAN CITY – Patuloy pa ang hot pursuit operation ng pulisya sa bayan ng San Francisco, Agusan del Sur upang makilala at mahuli ang mga responsable sa pagholdap-patay sa biktimang babae dakong alas-11:00 ng umaga sa Purok-1A, Barangay Uno, ng nasabing bayan.
Sa impormasyong nakuha mula sa San Francisco Municipal Police Station, ang biktima na patuloy pang kinilala ay sakay ng traysikad patungo sana sa Brgy Hubang, ng nasabi ring bayan ngunit pagdating sa lugar na pinangyarihan ay bigla na lang tinabihan ng riding-in-tandem ang traysikad sabay baril sa biktima kung kaya’t kumaripas naman ng takbo ang sikad driver.
Makita sa CCTV footage na matapos kunin ang sling bag ng biktima ay kaagad namang tumakas ang dalawa sa ‘di pa malamang direksyon.
Narekober sa crime scene ang anim na basyo ng bala ng ‘di pa malamang uri ng armas.
