DAVAO CITY – Patay ang isang babae matapos na tumalon umano ito sa sinasakyang motor sa Seminary Drive,Magugpo West Tagum City nitong Linggo ng madaling araw.
Kinilala ang biktima na si Lanie Casigluman, 20 gulang at residente ng Bermudez, lungsod ng Tagum.
Sa isinagawang imbestigasyon ng kapulisan, napag-alamang habang naka-angkas ang biktima sa motorsiklo na minamaneho ng kanyang nobyo na kinilalang si Brylle Jayson Jimenez, 23 taong gulang, nag-away umano ang dalawa hanggang sa umabot sa puntong nakapagdesiyon ang biktima na tumalon mula sa motor ng kanyang kasintahan.
Dahil sa pagtalon nito habang umaandar ang motorsiklo, nagtamo ng maraming injuries ang biktima sa kanyang katawan.
Agad pa itong dinala sa bahay pagamutan ngunit hindi na nakaabot pa ng buhay.
Sa ngayon, patuloy parin ang isinasagawang imbestigasyon ng kapulisan tungkol sa nangyaring insidente.
