Pasok ang awiting “Bazinga” na siyang latest hit ng sikat na Filipino boy group na SB19 sa pinakabagong weekly chart ng Billboard na Hot Trending Songs Chart.
Nasa pang-siyam na pwesto ang kanta ng SB19, na noong Oktubre lang ay inilabas ang music video, na sa ngayon ay mayroon ng 1.6 million views sa YouTube.
Kasama nga ng grupo sa nasabing Billboard chart ang mga globally-known artists tulad ng BTS, Seventeen, Lisa ng BLACKPINK at NCT127.
Ang SB19 nga ang kauna-unahang Filipino music act na nakapasok sa nasabing chart. Ang nasabing Billboard chart ay nagtatala ng mga kanta na mainit na pinag-uusapan sa social media platform na Twitter.
Samantala, nominado ang SB19 bilang Best Southeast Asian Act sa 2021 MTV Europe Music Awards na gaganapin sa November 15.
