Kumpiyansa si Speaker Ferdinand Martin G. Romualdez na mas lalaki ang kita ng mga magsasaka at bababa ang presyo ng pagkain para sa mga Pilipino sa pagbubukas ng planta ng biological fertilizer sa Laguna.
Sa kanyang mensahe sa inagurasyon ng Bio N fertilizer plant ng Agri Specialist Inc. sa Sta. Rosa, Laguna ngayong Linggo, sinabi ni Speaker Romualdez na ang bagong planta ay magdadala ng bagong yugto sa sektor ng agrikultura sa bansa at isang mahalagang hakbang para sa mga lokal na magsasaka, suplay ng pagkain, at kinabukasan ng bansa.
Ang Bio N, na binuo ng mga Pilipinong siyentipiko mula sa UPLB, ay isang biofertilizer na makakapagpababa sa pangangailangan na gumamit ng mga kemikal na pataba, magpapaganda ng kalusugan ng lupa, at magpapababa ng gastusin sa pagsasaka.
Binanggit niya na matagal nang pasan ng mga magsasaka ang mataas na presyo ng imported na pataba, dahilan upang ang seguridad sa pagkain ng bansa ay labis na maapektuhan ng pabagu-bagong presyo sa pandaigdigang merkado.
Sinabi ni Speaker Romualdez na ang bagong planta ng biofertilizer ay alinsunod sa layunin ni Pangulong Ferdinand R. Marcos Jr. na wakasan ang pagdepende ng bansa sa mga imported na produkto.
Ayon kay Romualdez, ang bagong planta ay magbibigay ng dagdag na mapagpipilian, solusyon, at suporta para sa ating mga magsasaka.
Ang planta, na may makabagong bioreactors, automatic packaging systems, at microbiology research lab, ay kayang makagawa ng 7,000 metric tons ng Bio N kada taon—sapat upang matugunan ang pangangailangan ng mga magsasaka ng palay at mais sa buong bansa.
Pinuri ni Speaker Romualdez ang inisyatiba bilang patunay ng husay at sipag ng mga Pilipino.
Binigyang-diin niya na ang inagurasyon ng Bio N plant ay resulta ng dekadang pananaliksik at inobasyon ng mga siyentipikong Pilipino sa UPLB.
Dagdag pa niya, patunay ito na maaaring magtulungan ang pribadong sektor, gobyerno, at mga institusyong pananaliksik upang magdala ng tunay na pagbabago sa buhay ng karaniwang Pilipino.
Hinimok din niya ang mga mambabatas at negosyante na mag-invest pa sa agrikultura, dahil aniya, ang matatag na sektor ng agrikultura ay nangangahulugan ng matatag na ekonomiya, matibay na komunidad, at mas malakas na bansa.
Nanawagan din siya sa lahat ng Pilipino na suportahan ang lokal na sektor ng agrikultura.
