CENTRAL MINDANAO – Pormal ng nanumpa bilang bagong konsehal ng lungsod ng Kidapawan si Galen Ray Lonzaga na nakatatandang anak ni City Councilor Gregorio Lonzaga na nagbitiw sa kanyang posisyon kamakailan lang.
Nanumpa ang nakababatang Lonzaga sa harap nina Cotabato Governor Nancy Catamco at City Mayor Joseph Evangelista sa Governor’s Office, Provincial Capitol, Amas sa Kidapawan City.
Sinaksihan ng kanyang maybahay at mga kaaanak ang panunumpa ni Lonzaga.
Paglilingkuran ang nalalabing termino ng kanyang ama na nagbitiw dahil sa iniindang sakit.
Plano niyang ipagpatuloy ang mga programa ng kanyang ama patungkol sa pagpapatatag sa kakayahan ng mga barangay.
Inaasahang dadalo si Lonzaga sa kanyang unang regular session bilang bagong konsehal sa Sangguniang Panlungsod sa April 28, 2021.
Todo suporta naman ang ipinaaabot ni Mayor Evangelista kay Lonzaga.
Una na siyang nanungkulan bilang Executive Assistant ni Mayor Evangelista mula 2013 bago maging konsehal ng lungsod.
