-- Advertisements --

Kumpirmadong nasawi si Silimee, ang Miss Tourism Myanmar 2018, matapos matagpuan ang kaniyang bangkay sa guho ng Sky Villa condominium sa Mandalay, bunsod ng malakas na lindol na tumama sa Myanmar noong Marso 28, 2025.

Ayon sa opisyal na pahayag ng Miss Tourism Myanmar, Si Silimee, na kumatawan sa Myanmar sa Miss Tourism World 2018, ay nasawi matapos ma-trap sa gumuhong gusali sa gitna ng lindol. Natagpuan ang kanyang katawan ng mga rescue team noong Abril 2.

Umabot sa magnitude 7.7 ang lindol na yumanig sa gitnang bahagi ng bansa at naramdaman din sa mga kalapit na bansa gaya ng Thailand, Vietnam, at ilang bahagi ng China. Agad na nagpatawag ng emergency meeting si Thai Prime Minister Paetongtarn Shinawatra kaugnay ng insidente.

Ang Sky Villa ay isang 12-palapag na gusaling itinayo noong 2017, na kabilang sa pinakamatinding napinsala. Kilala ito sa pagkakaroon ng pinakamalaking rooftop bar at modernong gym sa Mandalay, at dati’y ipinagmamalaki ang umano’y “earthquake-resistant” nitong disenyo.

Sa pinakahuling ulat nitong, umakyat na sa 3,085 ang bilang ng mga nasawi sa lindol.