KALIBO, Aklan—Umapela ng dasal sa mga Pinoy ang Boracay All Stars Dragon boat team matapos kabilang ang mga ito sa tatlong team mula sa Pilipinas na sasabak sa International Dragon Boat Festival sa Changwon City, Korea na gaganapin sa Nobyembre 2-4, 2024.
Ayon kay Nuckie Fernando, head coach ng nasabing team na hangad nilang makauwi ng gintong medalya mula sa kompetisyon kung saan, kasali ang grupo sa mixed small boat category na may limang pares na kinabibilangan ng kombinasyon ng lalaki at babae.
Binubuo ng 16 na paddlers ang grupo na bumyahe papuntang Korea, araw ng Miyerkules, Oktobre 30, 2024.
Makalaban nila sa taunang festivities ang iba pang mga atleta mula sa host country na Korea at iba pang mga bansa gaya ng Hong Kong, Singapore, Canada , Taiwan at iba pa.
Sa kabilang banda, nakatakda rin na sasabak ang nasabing grupo sa isa pang kompetisyon sa Iloilo River Dragon Boat Festival sa darating na Nobyembre 23-24, 2024.
