CENTRAL MINDANAO-Dead on arrival sa pagamutan ang isang Barangay Tanod matapos na barilin sa Cotabato City.
Nakilala ang nasawi na si Jimran Midtimbang,Brgy Tanod ng Barangay Rosary Heights 10 Cotabato City habang sugatan ang kanyang kasama na si Benjie Abdillah.
Ayon sa ulat ng Cotabato City Police Office (CCPO) na habang sakay ang mga biktima sa isang motorsiklo sa LR Sebastian RH-10 ng lungsod ay bigla itong dinikitan ng riding in tandem suspect at pinagbabaril gamit ang kalibre.45 na pistola.
Mabilis namang tumakas ang mga suspek nang makita nito na naliligo na sa kanilang sariling dugo sina Midtimbang at Abdillah.
Agad dinala ng mga nagrespondeng pulis ang mga sugatan sa Cotabato Regional and Medical Center (CRMC) ngunit hindi na umabot ng buhay ang Brgy Tanod at nasa masilang kondisyon ang kanyang kasama.
Sa ngayon ay blangko pa ang mga otoridad sa motibo sa pamamaril sa mga biktima at patuloy pa silang nag-iimbestiga.
