Emosyonal nang magsalita ang comedian at aktor na si Buboy Villar kay Boy Abunda nitong Biyernes, Abril 4, 2025, kung saan tinalakay niya ang mga mabibigat na paratang ng kanyang dating karelasyon na si Angillyn Gorens.
Naramdaman ang matinding emosyon ni Buboy nang pag-usapan ang mga alegasyon ni Angillyn laban sa kanya, at hindi niya napigilang humagulgol ng iyak.
Mariing pinabulaanan ni Buboy ang mga paratang ng pananakit kay Gorins, kabilang na ang isyung tinutukan daw siya ng kutsilyo.
Ang naturang reaksyon ng komedyante sa mga akusasyon na sinaktan umano niya si Angillyn habang ito ay nagdadalang tao.
Ayon pa sa kanya, ‘Hindi ko po magagawa sa kanya yun. Mahal na mahal ko po yung mga anak ko at may respeto ako sa kanya.’
Binanggit din ni Buboy na walang katotohanan ang mga akusasyon na siya ay nagkaroon ng relasyon sa ibang mga babae habang sila pa ay nagsasama ni Angillyn.
‘Never. Never!’ sagot ni Buboy sa tanong ni Boy Abunda.
Sa kabila ng mga akusasyon, patuloy naman sinusuportahan aniya ang mga pangangailangan ni Angillyn, lalo na’t may mga anak sila.
Dagdag ni Buboy, ‘Hindi po ako nagselos. Hindi ako nagalit kasi wala na po akong karapatan na magalit. Gusto ko pa rin na kahit hiwalay kami, nakasuporta pa rin po ako sa kanya. Hindi man financial support, emotional support.’
Isiniwalat din ni Buboy ang tungkol sa anak ni Angillyn sa ibang lalaki bago siya nakipagrelasyon kay Isay. Sinabi ni Buboy na nirerespeto pa rin niya si Angillyn at kahit may bagong ka-relasyon na si Angillyn, hindi siya nagalit kundi hangad lamang ang malasakit sa dating kasintahan.
Nang tanungin si Buboy tungkol sa kanyang mga anak, na may edad na 7 at 5, at kung nabanggit na ba nila ang tungkol sa bagong kapatid o relasyon ni Angillyn, sinabi ni Buboy na hindi pa niya ito naitanong ngunit nararamdaman niyang alam na nila.
Sa kabilang banda sinagot din ng komedyante ang paratang ng panggagamit sa kanilang mga anak para sa vlog content, na ayon sa kanya, hindi umano totoo.
‘Ang vlogging ko po, hindi naman po yan for money. Bonus na lang po yan kung kikita man ang video or not. Ang gusto ko lang po ay magkaroon kami ng mga alaala at bonding na pwede naming balikan sa hinaharap,’ ani Buboy.
Humingi naman ng paumanhin si Buboy tungkol sa mga nagawa nito kay Angillyn at sa kanilang mga anak.
‘Sorry kasi kung alam niyo lang, ayaw din ni Papa nito. Ayaw ni Papa ng ganitong nangyayari. Hindi gusto ni Papa ito. Pero lagi kong sasabihin sa inyo na mahal na mahal ko kayo,’ maluha-luhang mensahe ni Buboy.
Samantala, nanatili naman ang kanyang malasakit at pagnanais na magka-ayos sila para sa kapakanan ng kanilang mga anak. Habang hiling kay Angillyn, na sana’y mag-heal ito para sa kanilang mga anak.
