CEBU – Sa halip na magresponde ng sunog na nangyari sa White Road Barangay Inayawan, nirespondehan ang isang bumbero matapos itong madulas at sumalpok sa sinusundang fire truck.
Nangyari ang insidente sa kahabaan ng C. Padilla St, Brgy.Sawang Calero Cebu City.
Kinilala ang bumbero na si FO1 Brainard Gutang , na nanatiling conscious ngunit nakaranas ng seizure at isinugod sa pribadong ospital.
Ayon sa isang testigo na si James Petalyana, mabilis ang takbo ng biktima dahilan para madulas ito lalo na nang umapaw ang tubig ng ilang fire truck na
kanyang sinusundan.
Sinabi ni Petalyana na matapos madulas ang biktima ay sumalpok ito sa ilalim ng fire truck at saglit na nakaladkad na posibleng dahilan ng seizure nito.
Nabatid na sinusundan ng biktima ang mga fire truck na tutugon sa sunog na sumiklab sa White Road, Barangay Inayawan.
