Ipinroklama ng Commission on Elections nitong Biyernes si Roberto “Pinpin” Uy Jr. bilang panalo sa 2022 race for first district representative ng probinsya ng Zamboanga del Norte.
Ang pagkaproklama kay Uy nangyari dalawang buwan ang nakalipas matapos napagdesisyonan ng korte suprema na siya nga ang nanalo sa 2022 race.
Dinaluhan ni Comelec spokesperson Rex Laudiangco ang pagproklama sa mambabatas na ginawa sa Palacio del Gobernador office sa Comelec sa Maynila.
Matatandaang sinuspende ng Provincial Board of Canvassers (PBOC) ang pagproklama kay Uy noong May 12, 2022 kahit na siya ang nakakuha ng pinakaraming boto na 69, 591 batay sa complete transmission of election results.
Si Romeo Jalosjos Jr., na iprinoklama ng Comelec bilang nanalong kandidato sa pagka-kongreso noong Hunyo 23, 2022, ay orihinal na pumangalawa sa likod ni Uy na may 69,109 na boto, ngunit nagpasya ang poll body na “legally pass” ang 5,424 na boto na nakuha ni Frederico Jalosjos, na naunang idineklara na isang nuisance candidate.
Dahil dito, nakakuha si Jalosjos ng kabuuang 74,533 boto, na nanalo kay Uy ng 4,942 na boto. Pagkatapos ay sinabi ng Comelec na ang mga boto na natanggap ng isang nuisance candidate ay dapat na ikredito sa lehitimong kandidato na may parehong apelyido.
Gayunpaman, nagpasya ang SC noong Agosto na ang mga kandidatong tumatanggap ng pinakamataas na boto ay dapat iproklama nang walang hindi kinakailangang pagkaantala.
Hinggil naman sa kaso ni Uy, inihayag ng SC Public Information Office, na ang Comelec, motu proprio, ay nag-utos na suspindihin ang kanyang proklamasyon kahit na ang PBOC ay may malinaw na batayan para iproklama si Uy bilang nanalong kandidato, na nakakuha ng pinakamataas na bilang ng mga boto.
Sinabi rin ng SC na sa kabila ng pagkakatulad, ang pagkakaiba sa mga pangalan nina “Jalosjos, Kuya Jan (NUP)” at “Jalosjos, Jr., Romeo (NP)” sa mga balota ay higit pa sa sapat upang makilala ang mga entri.
