Pormal nang inamyendahan ng Department of Agriculture (DA) ang mga patakaran sa paggamit ng mga African Swine Fever (ASF) vaccines para mas maprotektahan at mapalakas ang swine industry sa bansa.
Ang mga naturang patakaran ay nilagdaan ni DA Sec. Francisco Tiu Laurel Jr. na naglalaman ng mga revised provisions sa DA Administrative Circulars 05 at 08 na parehong pinagtibay ngayong taon.
Ang mga polisiyang ito ay pinirmahan para mas mapabilis ang pamamahagi ng mga bakuna sa mga key areas partikular na ang mga probinsiyang wala nang mga aktibong kaso ng ASF sa loob ng 40 na araw o mga lugar na naitala na bilang negative ASF surveillance results.
Sa ilalim din mga nabagong polisiya, mas pagagaanin ang mga requirements ng mga hog raisers para mapabakuna ang kanilang mga alagang baboy.
Kabilang din sa mga naamyendahan ay ang mga bagong guidelines sa mga bakunado ng baboy at ang mga kailangan pang clearances base sa kalusugan at mga magiging test results ng mga ito bago ito iangkat sa merkado.
Samantala, inaasahan naman ng ahensya na mas mapapaigting ang biosecurity measures sa mga produktong baboy at maski ang pagkontrol ng mga kaso ng ASF para sa mas maingat na pagaangkat ng mga ito sa bansa.
