Para maparami raw ang magiging ani ng mga magsasaka, magsasagawa na ang Department of Agrarian Reform (DAR) ng pagsasanay sa mga agrarian reform beneficiaries at communities kaugnay ng bagong farming methods at techniques.
Sinabi ni DAR Secretary Conrado Estrella III na inilunsad na ng kagawaran ang intensive training para sa mga interesadong agrarian reform beneficiaries’ organizations (ARBOs).
Aniya, tinatayang aabot sa 7,500 agrarian reform beneficiaries’ organizations o ARBOs sa buong bansa ang target ng pamahalaan na matulungan sa food security program.
Makikipag-ugnayan naman daw ang DAR Support Services sa Agriculture Training Institute (ATI) na nasa ilalim ng Department of Agriculture (DA) para sa pag-mobilize sa iba’t ibang agrarian reform beneficiaries’ organizations nationwide para makapag-establish ng demonstration farms sa ilalim ng Farm Business School (FBS) project.
Kasunod nito ay magsasagawa naman sila ng evaluation sa kahandaan ng mga agrarian reform beneficiaries’ organizations sa pagharap sa mga hamon ng pagpapaangat sa food productivity.
Sinabi naman ni Atty. Milagros Isabel Cristobal, DAR Undersecretary for Support Services, ang Farm Business School ay isang long-standing project ng DAR at ang mga interesadong miyembro ng agrarian reform beneficiaries’ organizations ay sasalang sa training sa bagong farming methods para tulungan silang makapag-produce nang mas marami at dekalidad na ani.
Ang demonstration farms ay magiging model farms na bibisitahin ng agrarian reform beneficiaries’ organizations at dito matututuhan ang farming techniques na puwede nilang gayahin sa kanilang mga lugar.
Dagdag ng opisyal, target din daw ng DAR na makumbinsi ang kahit isang miyembro ng agrarian reform beneficiaries’ organizations kada rehiyon sa buong bansa na maging pioneer ng programa.
Bilang dati namang Abono Partylist representative, sinabi ni Estrella na mataas ang respeto nito sa mga magsasaka at farmer’s organizations nationwide.
Sinabi pa ni Estrella na isa sa mga direktiba ni Pangulong Ferdinand “Bongbong” Marcos Jr ay i-maximize ang food production sa bansa.
Ang Pangulong Marcos ay kasalukuyang kalihim ng Department of Agriculture (DA).
