Nilinaw ng Department of the Interior and Local Government (DILG) na ang National Vaccination days, simula ngayong araw hanggang Disyembre 1, ay “non-partisan” at ang mga pulitiko na gumagamit ng mga aktibidad para sa political fanfare ay mahaharap sa mga kaso dahil sa paglabag sa mga pamantayan sa kalusugan.
Nagpaalala si DILG spokesman Jonathan Malaya na bawal gamitin ng mga pulitiko ang mga vaccination site para sa mga layuning pampulitika, kabilang ang paglalagay ng mga tarpaulin na may pangalan at pagdadala ng mga tao.
Samantala, sinabi ng National Task Force (NTF) against COVID-19 na ilulunsad ng gobyerno ang tatlong araw na national vaccination ngayong araw na kulang sa 51,000 volunteers habang inaasam nitong makamit ang tatlong milyong administered doses kada araw o siyam na milyon sa kabuuan.
Inatasan na nito ang mga local government units (LGUs) na mag-tap sa mga contact tracer na may medical background upang tumulong sa pagbibigay ng mga bakuna habang ang iba ay makakatulong sa pagkolekta ng data.
Nauna nang itinakda ng gobyerno ang target na 15 milyong inoculations sa three-day drive ngunit nabawasan ito dahil sa mga hamon sa logistik kabilang ang pag-aalangan at kakulangan sa mga ancillary supplies, partikular na ang mga syringe.
At para makabawi, nagtakda ang gobyerno ng pangalawang tatlong araw na vaccination drive sa Disyembre 15 hanggang 17.
Inaasahan ng gobyerno na maging fully vaccinated ang humigit-kumulang 54 milyong Pilipino bago matapos ang taon.
