Susuriin at muling isasaayos ng Senado ang ilang probisyon ng panukalang P5.268-trilyong pambansang badyet para maging mas tumutugon ito sa mga sakuna, habang inihahanda ng kamara ang mga deliberasyon sa plenaryo sa panukalang paglalaan sa pagpapatuloy ng sesyon ng Kongreso sa Nob. 7.
Sinabi ni Senate President Juan Miguel Zubiri na sa kamakailang lindol sa Abra at ngayon ay Paeng, tiyak na muling isaalang-alang, suriin at ayusin ang 2023 budget – hindi lamang para sa rehabilitasyon ng mga apektadong komunidad, kundi para palakasin ang kapasidad ng NDRRMC at mga kaugnay na ahensya at lokal na pamahalaan.
Kailangan aniyang ayusin ang mga pagsisikap sa pamamahala ng sakuna at patibayin ang whole-of-government approach sa hinaharap.
Magugunitang, inendorso ng Senate finance committee, na pinamumunuan ni Sen. Sonny Angara, para sa pag-apruba sa plenaryo ang iminungkahing badyet bago mag-recess ang Kongreso noong nakaraang buwan.
Inaasahang magsasagawa ng marathon deliberations ang mga senador sa General Appropriations Bill na may layuning maipasa ito bago matapos ang buwan.
Samantala, sinabi naman ni Speaker Martin Romualdez sa isang statement na bukas siya sa mga pagsasaayos sa badyet para sa parehong dahilan.
Gagawin nila ang lahat ng kanilang makakaya upang matulungan ang ating mga kababayan na makabangon muli mula sa kalamidad.
