Hiniling ng Department of Science and Technology na mabigyang pansin ang kanilang hangarin na maisakatuparan na ang Virology and Vaccine Institute ng Pilipinas.
Layunin kasi ng kagawaran na magkaroon ng ganitong institusyon na magpopokus ng pagtingin sa mga klasi ng sakit hindi lamang ng tao kundi pati sa mga hayop at halaman.
Sa isang panayam, ibinahagi ng kasalukuyang kalihim ng Department of Science and Technology (DOST) na si Secretary Renato Solidum, kung matutuloy man, ang pagkakatatag nito ay makatutulong sa kahandaan ng bansa sa susunod na pandemya kung magkakaroon muli.
Inaasahan din na makadaragdag ito sa pagdami ng kanilang mga tauhang eksperto at dalubhasa sa siyentipikong pag-aaral.
‘Syempre, yung biologics and pharmaceutical, at related ‘yan sa aming hangarin na ma-establish na Virology and Vaccine Institute of the Philippines para maparami pa ang magtatrabaho sa pagtingin sa mga sakit hindi lang ng tao pati hayop, at halaman. Kasi maliban sa paghahanda sa susunod na pandemic, talagang kailangan ding paghandaan ang food security.’ ani Secretary Renato Solidum ng DOST.
Samantala, ipinagmalaki naman ng naturang kagawaran ng Agham at Teknolohiya na patuloy ang kanilang isinasagawang pagtulong sa mga Pilipinong scientist na mapabalik ditong muli sa bansa.
Ayon kay Secretary Renato Solidum, mayroon ng nasa 120 Filipino scientists ang nasuportahan ng kanilang programa na pag-papauwi sa Pilipinas.
‘Sa July 2022 hanggang end of 2024, mahigit 120 plus ang ating napabalik nang mga scientist. Ang iba rito ay permanent na. Mas natutulungan natin kasi nabibigyan natin sila ng grant-in-aid funds para makabili ng laboratory, makapag-set up ng mga labs at marami na silang techonlogy na nade-develop para makatulong,’ pahayag pa ni Secretary Renato Solidum ng DOST.
