TACLOBAN CITY — Patay ang isang driver matapos bumangga ang minamaneho nitong van sa isang nakaparadang truck sa Brgy. San Juan, Santa Rita, Samar.
Kinilala ang biktima na si Melvin Bawer, 40 anyos, residente ng Barangay 4 Poblacion Calbiga, Samar.
Ayon kay Police Staff Sergeant Randy Costales, duty investigator ng Sta Rita Police Station, habang minamaneho ng nasabing drayber ang kanyang van ay nabangga nito ang isang nakaparadang truck sa gilid ng kalsada.
Maaaring hindi daw nakita ng biktima ang nakahintong truck pati na ang early warning device sa harap nito dahil sa malakas na ulan kaya nasalpok niya ito.
Dahil sa lakas ng impact, naipit ang kanyang katawan sa loob ng van at natagalan muna bago ito natanggal.
Maswerte naman walang pasahero ang nasabing van maliban sa misis nito na nagtamo lamang ng minor injury.
