Wala pang kasiguraduhan ang Brooklyn Nets kung kelan makakabalik ang kanilang superstar na si Kevin Durant matapos na ma-injure na naman sa game kanina kontra sa Miam Heat.
Una rito, nasilat ng Miami ang itinuturing na isa sa powerhouse team na Brooklyn, 109-107.
Sa kalagitnaan ng unang quarter pa lamang ay inilabas na sa game si Durant matapos na magtamo ng left thigh contusion.
Nakaipon naman ng walong puntos si Durant bago ito pinalabas sa playing court sa natitirang 7:57 minutes.
Sinasabing nasaktan ang kaniyang hita ng mabangga niya si Heat forward Trevor Ariza nang ito ay mag-drive.
Ayon kay Brooklyn coach Steve Nash, aalamin pa nila sa gagawing pagsusuri kay Durant kung gaano kalala ang panibago na naman nitong injury.
“He’s sore but we don’t know how severe,” ani Nash. “We’ll see tomorrow how he wakes up and go from there. But right now nothing’s been determined.”
Sa kabuuan umaabot na sa 33 games na bigong makalaro si Durant mula sa 57 games ng Brooklyn.
Sa naging laro kanina, bumida ang big man na si Bam Adebayo na siyang nagpanalo ng dalawang puntos na kalamangan ng Miami gamit ang buzzer beater.
