KALIBO, Aklan – Inaresto ng mga miyembro ng Kalibo Police Station ang 20-anyos na engineering student matapos umanong pagbantaan ang 19-anyos na karelasyon na ipapakalat ang mga malaswa nilang larawan.
Nahuli ang suspek makaraang magkasagawa ng entrapment operation ang pulisya sa isang lodging house sa bayan ng Kalibo kasunod ng pagsumbong ng hindi pinangalanang biktima.
Ayon sa complainant, tinakot daw siya ng suspek na itinago sa alyas John na ilalabas ang kanilang mga malaswang larawan kung hindi siya makikipagtalik sa suspek.
Kinumpiska ng mga otoridad ang cellphone ng suspek para sa kaukulang imbestigasyon.
Depensa ng suspek, pareho nilang napagkasunduan ng nobya na magtagpo sa nasabing lodging house.
Dagdag pa nito na halos tatlong taon na rin ang kanilang relasyon, subalit itinago ito sa mga magulang ng babae.
