CENTRAL MINDANAO-Binawian ng buhay ang isang estudyante sa pamamaril sa probinsiya ng Cotabato.
Nakilala ang biktima na si Baimojera Sulaiman, 21 anyos, dalaga, mag-aaral ng Cotabato Foundation College of Science and Technology (CFCST) Batulawan Campus at residente ng Barangay Talitay Pikit North Cotabato.
Ayon kay Cotabato Police Provincial Director Colonel Henry Villar na nakatayo lamang ang biktima sa harap ng Public Market at Public Terminal sa bayan ng Pikit nang lapitan ito ng hindi kilalang suspek at pinagbabaril gamit ang kalibre.45 na pistola.
Mabilis namang tumakas ang salarin at sumakay ng motorsiklo sa naghihintay nitong kasama sa labas ng palengke.
Naisugod pa ang biktima ng mga nagrespondeng pulis sa Cruzado Medical Hospital ngunit hindi na ito umabot ng buhay nang magtamo ng tatlong tama ng bala sa kanyang katawan.
Sa ngayon ay nagpapatuloy pa ang imbestigasyon ng Pikit PNP sa pamamaril patay sa estudyante.
