ROXAS CITY – Balik bilangguan ang ex-convict matapos maaresto kasama ang kaibigan na drug personality sa drug buy bust operation sa Costa Verde subdivision, Barangay Cagay, Roxas City.
Kinilala ang ex convict na si Johan Patrick Dequina alyas JP, 40 ng nasabing lugar at kaibigan na si Ervin Klein Dorado 24 ng Malipayon village, Barangay Tiza Roxas City.
Ayon kay Police Lieutenant Colonel Dante Tayco hepe ng Roxas City PNP, narekober sa mga suspek ang apat na sachets ng shabu, dalawang unit cellphone, P500 na marked money at drug paraphernalia.
Isinagawa ang operasyon matapos may nagbigay ng impormasyon sa mga pulis na patuloy ang pagtutulak ng droga ni Dequina sa kabila na nakulong na ito noon sa kapareho ring kaso.
Samantala, mariin namang pinasinungalingan ni Dequina na sa kanya nakuha ang mga shabu.
Ayon dito na walang drug buy bust operation na nangyari at nagulat na lamang sila ni Dorado ng bigla silang lapitan at arestuhin ng mga pulis sabay pinasok sa bahay.
Inireklamo rin ni Dequina ang diumano pagbugbog sa kanya ng mga pulis.
