Nakuha ni dating NBA player Royce White ang nominasyon ng Republican Party kasunod ng Republican senate primary race sa Minnesota.
Dahil dito, si White ang opisyal na kandidato ng Minnesota sa pagkasenador at haharapin niya si Democratic Senator Amy Klobuchar na noon pang 2007 nakaupo sa naturang estado.
Hindi ito ang unang pagsabak ng dating NBA player sa mundo ng pulitika dahil tinangka na niyang tumakbo noong 2022 bilang kongresista ngunit hindi nakuha ang endorsement ng kanyang partido.
Si White ay na-draft sa NBA noong 2012 bilang No. 16 overall sa pamamagitan ng Houston Rockets.
Gayunpaman, nahadlangan ang kanyang karera sa NBA dahil takot siyang lumipad sakay ng eroplano, kasama ang iba pang mental health issues.
Hindi siya ni minsan naglaro sa Rockets hanggang sa tuluyang na-trade sa Philadelphia 76ers. Hindi nagtagal ay napunta siya sa Sacramento Kings ngunit naglaro lamang siya sa tatlong games.
Matapos ang kanyang karera sa NBA, nagtungo siya sa Canadian National Basketball League kung saan ay nakakuha siya ng MVP.
Sinubukan din niyang pumasok sa MMA at minsang lumaban noong 2021 ngunit tuluyan ding natalo.
