Naihatid na sa kanyang huling hantungan ang yumao at dating Senate Pres. Aquilino “Nene” Pimentel dito sa Heritage Memorial Park, Taguig City.
Hindi napigilan ng may bahay ng dating senador na si Gng. Lourdes at mga anak na sina Sen. Koko’ Commission on Human Rights commissioner Gwen, Maria Petrina, Jac, Teresa Lourdes, at Lorrain Marie na bumuhos ang kanilang luha nang ipaabot ang huling paalam at isara ang kabaong ng former Senate President.
Dumalo rin ang ilang kaanak, kaibigan at supporters ng dating senador.
Alas-9:00 kanina nang magkaroon ng huling misa sa Chapel 7 kung saan ginunita ni Fr. CT Pascual ang pagiging makabayan at maka-Diyos ng yumaong dating senador.
Kinantahan din ito ng “You Are My Sunshine” na kung maaalala ay bahagi ng kwento ni dating Sen. Rene Saguisag nang magbigay ito sa Senado kamakailan.
Binigyan ng military honors at 3 volleys of fire ng Philippine Military at Escort Battalion si Pimentel gaya ng ginagawang pagkilala sa mga yumaong civil dignitaries.
Abot abot na pasasalamat naman ang ipinaabot ng pamilya Pimentel sa lahat ng nakiramay at nagpaabot ng pagmamahal sa kanilang padre de pamilya.
Ayon sa anak ng dating senador na si Maria Petrina, dasal at pagmamahal ng publiko ang kanilang sandigan ngayon para makabangon at mapagpatuloy ang legasiya ng kanilang yumaong ama.
