Naglunsad ng pagsisisyasat ang National Privacy Commission (NPC) kung ang mga telecommunication company (telcos) at mga platform ng pagbabayad ay nagsasagawa ng angkop na pakikipag-transaksyon sa mga data aggregator kaugnay sa mga text message na nag-aalok ng mga pekeng trabaho at investment scheme.
Lumikha na ang kagawaran ng inter-agency group upang labanan ang smishing at text spam.
Sinabi ng NPC na inutusan nito ang telcos Globe Telecom Inc., Smart Communications Inc. at Dito Telecommunity Corp. na magsumite ng mga dokumento at impormasyon sa kanilang data flows at transactions na kinasasangkutan ng mga data aggregator sa loob ng limang araw.
Nagpadala rin ang NPC ng katulad na order sa Union Bank of the Philippines at Globe Fintech Innovations Inc., na nagpapatakbo ng mobile wallet na GCash, dahil ito ang mga pangunahing channel ng pagbabayad kung saan ang mga biktima ay idinidirekta sa mga text message na magdeposito ng kanilang mga pamumuhunan.
Sinabi nito na ang mga investment account ay hindi na ma-access ng mga biktima pagkatapos nilang magdeposito ng malaking halaga kapalit ng pagkuha ng mas malaking komisyon.
Sinabi na rin sa Bombo Radyo ni privacy commission Chaimran Raymund Liboro na noong nakaraang linggo, ipinatawag ng NPC ang mga data protection officers ng telcos, mga e-commerce players at mga bangko upang talakayin ang kasalukuyan at hinaharap na mga hakbang upang matugunan ang pagdami ng mga spam text message.
