Tinuligsa ng grupong magsasaka na Kilusang Magbubukid ng Pilipinas (KMP) ang panukala ng National Food Authority (NFA) na mag-angkat ng hindi bababa sa 330,000 metriko tonelada ng bigas sa bansa.
Layunin ng pag-aangkat na matugunan ang inaasahang kakulangan sa lokal na produksyon ng bigas.
Para sa grupo ng magsasaka, ang solusyon ng pambansang pamahalaan patungo sa inaasahang deficit na ito ay hindi dapat ang pag-angkat kundi ang pagsuporta sa mga lokal na magsasaka.
Ayon kay KMP Chairman Emeritus Rafael Mariano, ang unang utos ng Department of Agriculture at National Food Authority ay dapat na tulungan ang mga magsasaka na mapataas ang kanilang produktibidad upang makamit ang target na produksyon ng bigas at dagdagan ang rice buffer stock.
Upang magbigay ng konteksto, sinabi ng Malacañang na iminumungkahi ng National Food Authority ang scheme na ito upang masakop ang inaasahang kakulangan sa buffer stock ng bansa para sa mga relief operations ng iba’t ibang ahensya kung sakaling magkaroon ng kalamidad ngayong taon.”
Sinabi ni Mariano, na ang planong pag-aangkat ng bigas ay isang malaking kapinsalaan sa mga magsasaka at mga Pilipino.
Upang mapalakas ang industriya ng bigas sa Pilipinas at makatulong na maibsan ang paghihirap ng maliliit na magsasaka na Pilipino, hinimok ng Kilusang Magbubukid ng Pilipinas ang administrasyon na taasan ang lokal na pagbili ng palay sa hindi bababa sa 20 porsyento.
