BUTUAN CITY – Kaagad na nahuli sa inilunsad na hot pursuit operation ang isang gun runner na bumaril-patay sa isang pulis sa isinagawang entrapment operation pasado alas-8:44 kagabi sa may Purok 6, Brgy. Ampayon nitong lungsod ng Butuan.
Nahuli si Mark Tapic pasado alas-tres kaninang madaling araw sa may Purok 5-A, Brgy. Tiniwisan nito ring siyudad at inihanda na ang mga isasampang kasong murder at roberry matapos nitong tangayin sa kanyang pagtakas ang armas ng biktimang si PCpl. Ianklein Plaza na nadestino sa Regional Special Operations Unit-13.
Sa eksklusibong panayam ng Bombo Radyo Butuan, inihayag ni Butuan City Police Office spokesperson PCapt. Anne Cubio na ginawa ang entrapment operation upang hulihin sana ang suspetsado dahil sa pagbebenta nito ng mga hindi lisensyadong armas.
Na-amoy umano ni Tapic na pulis ang kanyang katransaksyon kung kaya’t inagaw nito ang armas sa pulis at binaril ng dalawang beses sabay takas.
Dinala pa sa ospital ang biktima ngunit idinekara itong dead-on-arrival.
